مبروك ابنك بقى سيكوPsycho
الموقف د كتييير بيحصل قدامى .
الام مع ابنها او بنتها .. لو سألت على سلوك معين الطفل يقولى شوفت ماما بتعمله فعملته ، او ماما علمتهولى
وبيكون رد فعل الام لحظتها ( ولد 😕 !! هههه ،ولد شقى مش مؤدب خالص معلش ) مع نظرة " هتشوف يوم اسود ان شاء الله "👿 او موقف تانى ( طفل كان بيقضم " بياكل ضوافره " ، لما حاولت الهيه عنها لانى تخيلته للوهله الاولى سلوك نفسى نتيجة خوف او توتر دائم مثلا ، لكن فوجئت بيه بيقولى لو بابى بطل ياكلهم انا هبطل " مع نظرة رخامه طفولية كده " )
انننن اتعلمها من بابى . 👀
_ نوقف هنا كده شوية -
أحنا ليه بنتكسف او بنحرج من اى سلوك طفلنا بيعمله قدام حد ويعمل اسقاط علينا او يقول انه اتعلمه مننا ؟
هل بنتكسف اننا طلعنا قدام حد غريب ام مستهترة ، او اب غير مدرك لافعاله مثلا ؟!
طيب هل بتحرج ان السلوك د ظهر قدام الناس بدل ما كان يظهر بينكو ف البيت بس ؟ يعنى ابنى ياكل ضوافره ف البيت مفيش مشكله ،سلوك اطفالى وبكرة يبطله " مش مؤذى يعنى " بس ميعملوش قدام الغريب عشان الشكل العام !!
وممكن جدا لما نروح البيت الام تمسك ابنها او بنتها ، تربيه 😠 بقى تقول قدام طنط انى اتعلمته من مامى .انا يا ولد؟! ..طيب جربتى تدخلى اوضتك وتقفى قدام المراية دقايق تسألى نفسك انا ليه بعمل السلوك د اللى اتنقل لطفلى وبقى بيقلده .. فكرة ان انا بقيت ام او اب فأصبحت اعلى من مستوى انى اقييم تصرفاتى خلاص واتنقلت لليفل مختلف انى بربى وبقيم ابنى بس . د مش صح
ابنك او بنتك هتلاقيه اوقات كتير "يـبلم " ف وشك فتسألة بتبصلى كده ليه ؟! يقولك اييه ..عادى .. طفلك ف سنين عمره الاولى بيرسم شخصيته منك انت يعنى بيحاول يقلد اى تصرف بتعمله ويحب تفاصيلك والوانك ويقلدها ومخه مبيفلترش ما بين التصرف الصح والغلط هو بياخد الباكيدج كامل . فمش من الصحيح انى اجى الومه على انا بعملها بعد كده .. الاصح انى اقَـوِم تصرفاتى اللى بالتبعيه هو هيقلدها .
عارفه ان الموضوع ف طى التنفيذ مش سهل .. بس لو فكرت انك مسؤول عن تكوين شخصيه بنى آدم هتتحمس جدا انك ترسمها بما يجعلك فخور بطفلك فيما بعد .
زى مافى اطفال كتييير لو اتسألوا هقولك كلمة وتقولى بتفكرك بأيه او مين بيعملها معاك ؟ " الحب " "الحضن " "الاكل الحلو " بيعبر عن ده ب "ماما او بابا " او بيقول انه اتعلمه من ماما ، و دى نماذج من الاطفال غالبا بتلاقيها اجتماعيه و ضحوكة ومش بتتكسف من التعامل مع الناس لان الام او الاب زرعوا فيه انه طفل جميل والناس بتحبه فلازم يكون سلوكه صح لنفسه اولا .
و الخلاصه لـ هووهى كل يوم اختار قيمة او سلوك معين اقرأ عنه اتدرب عليه .وخليه عاده عندك مهما كان بساطته ، عشان تتعود عليه و فيما بعد طفلك يستشفه منك .
متزعقش لطفلك مهما كان تصرفه . اقصى شئ بصله بنظرة حاسه " كده لا" ودايما وجهة بالمنظور الايجابي يعنى :
احنا انهارده هنخرج مع طنط فلانه واونكل فلان . ابنى حبيبي لو كان مؤدب زى مانا متعوده منه هجيبله حاجه حلوة . والناس هتحبه اوى / هتلاقى طفلك طول مدة التواجد مع اونكل وطنط هو محافظ على سلوكه الجيد لانه رابطه بمكافأة حلوة او خروجه نفسه فيها . / بدل / ما تقوله عارف انهارده لو عملت حركة بايخه هعمل فيك ايه . هموتك 💣 طفلك وقتها لو خاضع هيخاف حتى يسلم على الاشخاص دول وهينكمش ف مكانه ميتحركش وقتها احب اقولكم " مبروك ابنك بقى سيكوPsycho " ، ولو كان شخصيته متمرده هيعمل كل تصرف انت ناهيته عنه عشان يدايقك او يحرجك قدام الناس من منطلق " ورينى بقى هتعمل ايه "😋
رضوى نجيب
متخصصة الاتيكيت
تعليقات
إرسال تعليق