الاهتمام مبيتطلبش

رضوى نجيب

انت كراجل اول ما قرأت العنوان قلت دى اكيد (واحده نكدية او زنانه ) ..معلش هخيب ظنك

اولا المدونه المرادى موجهة لـ هو و هى سوا  👫
ثانيا : من وجهة نظرك شايف الاهتمام لازم يكون من الشخص من تلقاء نفسه ، ولا عادى ممكن يتطلب ؟!
غالبية الرجاله "العملية " هتقول لا اطلبى علطول انا مش المفروض انى انجم احتياجاتك ، والبنات جزء بسيط منهم عادى بيطلب والجزء الاكبر هيقول ماهو انت لو مهتم فعلا مش هحتاج اطلب ..
طيب خلونا نقسم اولوية الاهتمام او المواضيع اللى  ينطبق عليها الاهتمام لنوعين 👴:

أول نوع  خلونا نسميه "المواقف الحيوية"  /   و دى المواقف او الاوقات اللى  بديهيا المطلوب من هو و هى يتواجدوا باهتمام فيها ، زى ايه يا رضوى مثلا :

- المرض " لا قدر الله" سواء مرضها او مرضه ، حالة مرضيه تخص احد افراد عيلة واحد منهم .
-المناسبات العائلية ( فرح ، حزن ، ميلاد ..الخ ) وعدم التواجد فيها بنسأل هل هو نتيجة عدم اهتمام  و لا ف ظرف طارئ منع احد الطرفين من اثبات حضوره واهتمامه  ( لان المسألة مش دبح يعنى ) فى سينس ..مش غباء وخلاص
-حدث مهم شخصى او عملى / او تكريم
-مواقف بايخه هى اتحطت فيها ومحتاجه وجودك مثلا .
- موقف بايخ حصل معاه ومحتاج وجودك ع سبيل الكلام .


فى الحالات دى بيكون "الاهتمام " امر مفروغ منه ، فى حالة لو فى  حب او تقدير عام  ، لكن لو مفيش اى احساس من اى نوع " حيطة " ،يبقى بديهيا متوقعش اى اهتمام سواء منه او منها .

طيب ايه بقى المواقف اللى عدم الاهتمام ف لحظتها او التواجد فيها لا يمثل ازمة كونية ، او نهاية للعلاقه او طلع ندل او طلعت مش بنت اصول  ،والتعبيرات الجزافية دى ؟

- نزلتى من البيت ناسية محفظتك ، فكلمتيه وكان ف ميتنج او ف مشوار مسافته بعيده تماما عنك . معرفش يتعامل ، ببساطه شديدة كلمى بابا او اخواتك والموضوع هيتحل بنفس الكفاءه بردو .. تخيلي !
- قررت تاخد اجازة يم من شغلك وهى حاولت ومعرفتش ، د مش معناه نقص حب او اهتمام بيك ، خالص  د معناه ان ظروف شغلها تختلف عنك او عندها مدير رخم شويتين  او عندها شغل كتير صعب يتأجل ، فمبيكونش رد فعلك " يعنى شغلك اهم من حياتنا" بلاش الكلام الكبير اوى ده لانه مش حقيقي ولان " ممكن تتعوض "

ولكن بعيدا عن جميع الحالات اللى قلتها ، خلونا نتفق على حاجتين ف غاية الاهمية :
- لما انت تتعامل معاها ، اعرف ان ربنا خلقها "كائن عاطفى قبل ما يكون عقلانى " يعنى عكسك تقريبا ، وانتى كمان حطى ف الاعتبار انه لو عندو مسؤوليات ف شغله تقيله و مقدرش يكون معاكى ف موقف غير حتمى ، ده مش قلة اهتمام منه بس هو راجل "مسؤول " لو مشتغلش هتقعدوا تحبوا ف بعض على باب جنينة الحيوانات بكوزين درة  والشمس تاكلكوا !!

-تعامل من منطلق  ان نفس متطلباتك ف الحياة والعلاقه دى للاكتفاء والوصول للأشباع  هى بالظبط نفس متطلبات اللى قدامك . ولكن يختلف شوية ف طريقة التوصيل او التعبير ، كأنك عامل وديعة ف بنك ، كل ما تحب الرصيد المقابل يزيد ويوصلك للسعاده ، اشحن رصيدك   
( احنا بشر) بنتغذى  على الحب والاهتمام والتركيز والغيره  والاستعاب والسمع والنظرة .

واعذرونى ف اللى هقوله دلوقتى .
زى مانت كراجل اشباعك ف الحياة بيتم ف 3 حاجات ( نجاح او استمرار شغلك عشان الوصول والماده ، والشبع الجنسي، والاكل  ) ولو نقص حاجه منهم بتأزمك .. هى كمان اشباعها ف حاجات معينه (النجاح العملى، الامان المعنوى بكل معناه ، الشبع الجنسي )

فلو قررنا ندخل علاقه ببخل ف الاهتمام  او تصيد للأخطاء بدل من محاولة تصليحها او التعامل  وكأن احد الطرفين مَن ع التانى بالعلاقه دى نتوقع ان حسابنا ف العلاقة دى هيتقفل ف اسرع وقت .


#هووهى