الرجاله بيحبونى كده

رضوى نجيب

احنا كبنات كتير فى المجتمع العربى  بنقيم نفسنا ونديها درجات بناءا على  كام حاجه :

- سننا
- شكل جسمنا
- وعينا الدينى " تديننا"

-سننا :
تلاقى بنت ف اول التلاتين المسألة بقيت ماشيه معاها بشكل من اتنين  ( اما مركزة بزياده فالواقع العملى والصحاب مثلا عشان تشغل الفراغ العاطفى اللى عندها ) وده شئ طبيعى جدا او ( كل تفكيرها بيتمحور ف مسألة انا عديت التلاتين كده اصبحت مجتمعينا عليا هاشتاج # عانس ، او فرصى ف الارتباط اصبحت اقل ومن نماذج انا مش حرة ف اختيارها )

-شكل جسمنا:
حاجه من تلاته اما ( وزنى زايد ومبسمعش من اى حد غير كلمة #دايت )
جربتى الدايت الفلانى ؟
لازم تعملى دايت يا بنتى!
الحقى اعملى دايت قبل ما يتقدملك واحد ويطلبها منك . د ان وافق  يتقدم اصلا !

او شكلى سكسى بقي وكيرفي وبعمل تمارين لمناطق معينه عشان اوصل لشكل معين ، وفالحاله دى بيكون عندى هسهس لأ مش هاكل شوكلت مع ان عينى هتطلع عليها ، لا هقضيها سوشى او علبة تونه !  واغلب صورى عالاسنتجرام وقتها بتكون وانا بالبروفيل بتاعى عشان ابين المجهود المبذول . مانا حابه نفسى كده ، وكمان كم اللايك والكومنت الذكوريه على جمالى تخلينى اعيش ع المية بس هههه ، ماهو الرجاله بيحبونى كده ..

-وعينا الدينى :
اطول الحجاب ولا اتنقب احسن ؟!
احضر دروس  دين ؟ طيب احفظ القرآن ..
وطبعا التلاته حلوين حسب قناعتك الدينية .

بس الفكرة بقى انا عايزة كل ده عشان اوصل لحالة الرضا الداخلى ولا عشان ارضى العيون اللى بتشوفنى ؟
انا متصالحة مع نفسى سواء كنت 120 كيلو او 40 كيلو  ؟
بيضا لدرجة النمش او سمراء افريقية ؟

بنات وسيدات بشكل اخص ، لما بيسمعوا عن اتيكيت الانوثة لما بتكلم عنه ،بتكون تعليقاتهم كالاتى:
يعنى انا على كَبَر كده هتعلمونى امسك الشوكة والسكينه واتكلم ازاى .. ايه الخيابه دى ؟
او بنت ف العشرين تاخد الموضوع بحساسية وتقول ،انا محدش يعلمنى ابقى ليدي ازاى .. ده انا قمررر .

مع ان فكرة التصالح مع الذات والاعتراف بالنواقص اللى عندى اللى انا محتاجة املاها واشتغل عليها ، فكرة مهمة جدا ، لو سلطتى كل تفكيرك على نفسك واحتياجها منك وتجاهلتى لوقت بسيط نظرة الاخرين وتقيمهم ليكى ..هتلاقى نفسك وصلتى لمنطقة احسن بكتير ..
بنات كتير بتتعامل مع الاتيكيت على انه بيفضح عيوبها ، في حين ان الاتيكيت بيعلمنا نشوف نفسنا احلى وبيعلمنا الصبر، وأليكى كمان مفاجأة الاتيكيت بيوصلك لجسم رشيق جدا .. لانك بتتعلمى تاكلى بهدوء واستمتاع بالاكل ، فبتاكلى كل اللى تشتهيه وبكميات اقل .
يعنى ولا حرمان ولا افراط .. زى ما الدين كمان بيقول .

الدين والشكل الخارجى ماهو الا وسيلة تحصلى بيها على سلامك الداخلى .

وخللى بالك أسرع طريقة للأنتحار او التعقيد والانطواء هو محاولة ارضاء الاخرين بكل الطرق  لدرجة اننا اوقات من كتر محاولاتنا ف ارضاء غيرنا بنلغى شخصيتنا وبالوقت بنكون نسخه من شخصيات تانيه مش شبهنا.. ارضى نفسك اولا
وافتكرى ان اللى هتتحاسبى عليه عند ربنا (هو نفسك  واللى وصلتيها ليه ، واولادك ونشأتك ليهم فيما بعد )
ايوة بردو معرفتش اعمل ايه عشان يبقى اسمى بهتم بنفسى؟!

- اتكلمى مع نفسك واسمعى صوتك واعرفى  ايه اللى جواكى ، زى ما بتسمعى صحابك ومشاكلهم . اتعرفى على "أنتى "
-أشربي مية كتير ، خللى معاكى مية ف شنطتك وعربيتك وجنب سريرك ومكتبك ، عشان تشوفيها كتير
- تواصلى مع ربنا بأى طريقة تشوفيها مريحه ليكى . وياحبذا الصلاة لانها الاقرب ليه .
- متتخيليش ان اخطاءك او ذنوبك هى حاجز بينك وبين ربنا ، لأ .. ربنا خلقنا بشر على الارض يعنى "حيث المعاصى" ، لو كان عايزنا ملايكه مكانش نزل آدم الارض . بس هو عايزنا نلجألة  علطول  .
-اشتغلى فى المجال اللى تلاقى نفسك فيه ، والاقى نفسي ازاى ؟ جربى كذا حاجه وهتعرفى تلاقى نفسك ف النص
- كافئي نفسك على  اى حاجه حلوة وصح بتعمليها .
- أضحكى ، الضحك بيريح القلب .

- ألعبى اى نوع رياضه ( يوجا ، تأمل ، رقص ، باليه ) او خليلك هواية ( رسم ، عزف ، غنا)
- لو لاحظتى تصرف وجعك من شخص او ف مكان ، نبهى اللى قدامك انه دايقك لو اتكرر تانى ابعدى عن المنطقه دى و الشخصيه دى . لان فى ناس بتستلذ وجع غيرها ، وناس عندها مشاكل معينه شايفه ان اى حد يقرب منها لازم ينغمس معاها فيها .
_ احترمى نفسك . وقدريها
- أقرى ف اى مجال تحبيها ( ادب ، شعر ، تاريخ ، سياسه ، فن ، تطوير ذات )