عايز علاقتك العاطفية تنجح 😊 ؟
رضوى نجيب متخصصة الاتيكيت
ايه ده ؟ّ 5 حاجات بس يخلوا العلاقة لذيذه كده 😉. طب ايه يا ترى ؟
فالبداية فى نقطة مهمه جداً عايزين نتفق عليها ، ان كل علاقة بين شخصين " هى مميزة ومختلفه " بتفاصيلها ، يعنى مفيش علاقة شبه التانية ابدأ ، كل واحده حسب صفات الشخصين ، ولكن ليه بنقول ان ف مفاتيح تنجح اى علاقة ، لان حسب الابحاث اللى أُجريت على علاقات كتير فى دول مختلفه بنلاقى قواسم مشتركة بين اغلب العلاقات الناجحه ، وهى دى سر نجاحها ، اللى هى ايه ؟ تعالوا نشوف سوا 😊♥
1- لعلاقة عاطفية مثالية :
مفيش شئ على وجه الارض مثالى او معمول بدقة شديده غير "صنع ربنا " ، ولكن اى شئ دخل فيه العقل الانسانى دايما بيكون فى نواقص او ديفوهات ، و بالتالى مفيش علاقه عاطفية تتسم بالمثالية ولكن فى اوقات او تفاصيل وافعال الطرفين بيسعوا انهم يخلوها متميزة ومختلفة ..
يعنى مفيش شئ ف حياتكو هيكون مثالى الا لو انتوا سعيتوا لأنجازه واتمامه بأحسن شكل سوا ..
2- الانفصال هو الحل :
كـتير من العلاقات اللى بيظهر فيها خلاف قوى او اختلاف فى وجهات النظر او الطباع ، لو سألت الطرفين او أحدهم ( ياترى انت شايف ايه الحل للأزمة دى ؟ ) هيقولك ( نتطلق او ننفصل 💔 ) أسمع منى مفيش حل ينهى الخلاف ده غير الانفصال !
ودى بتكون أكبر غلطه ،بيرتكبها اى اتنين وقت مواجهة اول مشكله او خلاف شديد شوية ،قبل النقاش الحقيقي .
و الازمة الحقيقية هنا ، ان "الطلاق و الزواج " بقوا قرارات سهله ناس كتير بتاخدها لما بتلاقى ازمة فى الحياة او صعوبات ف العلاقات . بمعنى ان كتير من العلاقات العاطفية بيقرروا يسرعوا خطوة الزواج لما بيلاقوا ان المشاكل بتكون قوية شوية ، من باب ( اننا لما هنكون مع بعض هنكون اقوى فمواجهة المشاكل وهنسند بعض ) واحيانا قد يكون ده القرار الصحيح واحيانا لا .
وبالنسبة للأنفصال بيكون القرار الامثل فى حالة تجربة كل السبل ولكن النتيجة واحده غير نافعة .
بخلاف ان تحليل زيادة معدلات الطلاق لـ 16%اكتر فى 2017نتيجة تصورنا ان الطلاق أسهل حل زى ما بنقول ( للراحة من وجع الدماغ ) ،بالرغم من انه قد يكون حل سريع مؤقت ولكن الحل الجذرى متعملش ، وهتفضل مع كل علاقة جديده تدخلها ، أول ما تواجه مشكله قوية هتلجأ للأنفصال وبالتالى مع الصعب انك تقدر تكون حكيم او قادر على حل مشاكلك بمنطقية واسباب . فأنت الخاسر الاول ..
3- الخوف من الحوار الصريح :
كتير من المرتبطين بيكتفوا أنهم يحكوا لبعض على تفاصيلهم الظاهريه واحداثهم العامه ، وبيخافوا او بيخجلوا انهم يحكوا اسرارهم او خباياهم ، من باب :
- ممكن يتم مصادرته
- ممكن يُعامَل بتجاهل
-لا يتم احترام حواره ويفقد الثقة
وبالتالى كتير من المرتبطين ، اما هو مبيحبش يحكى تفاصيلة ويفضل الاحتفاظ بيها لنفسه لانها ممكن تحكم عليه بشئ غير حقيقي ، او هى تخبى لعدم فقدان تقديره ليها ومن ثم الانفصال عنها . او بعد الحوار يتم التعامل بشكل فيه انتقاص للطرف الاخر او عدم شعور بالراحة تجاهه .
فلازم اولا : تُحسن تقدير عقلية الشخص اللى معاك ومدى تصالحة مع نفسه
وثانيا : تختار بس الوقت المناسب وتتكلم بوضوح بدون خبايا ، لو عايز توصل لعلاقة قوية .
4- الحب اللفظى فقط " لا ينجح " :
الحب يشمل معانى كتير ، لابد من توافرها فى العلاقه لضمان استمراريتها بنجاح .
كلمة " بحبك " بس رغم رقة معناها ولكنها لا تُثمن ولا تغنى من جوع ، اذا لم يتم دعمها من خلال اظهار
( الاحترام ، الثقة ، التسامح ، الرعاية ) واهم واجمل مافى التعبير عن الحب هو جعله " غير مشروط " .
ودائما لازم نراعى ان عدم شعور الطرف الاخر بألاهتمام اللى يستحقه والحب والتفاهم من قِبًلك هيخليه يمل ويبدأ يبعد و يدور على بدايل اخرى .
5- دعمك ليه مهم :
دعمك لشريكك ف العلاقة امر مهم جدا ، حتى لو كان دعمك ليه فى قرار او فكرة انت غير متوافق معاها ، ولكن بقاءك بالقرب منه فى خطواته هيحميه ويخليه يتوخى الحذر اكتر لانه مدعوم بيك .
و أفتكر دايما انك المصدر الوحيد للامان العاطفى ليه ، عدم وجودك شئ غير محبذ او غير آمن ليه ، ومجرد دعمك ليه ف وقت اكتشافه خطئة هيخليه يطمن اكتر بوجودك ويعيد التفكير فيما هو لاحق ويحسن التفكير ، لانه اقوى بيك .
و دايما احتفظوا بفكرة الانفصال ، كأبعد نقطة ممكنه تقدروا توصلولها ، وألجوا للحوار والنقاش للحفاظ على علاقتكم
تعليقات
إرسال تعليق