انجح 5 طرق للتعبير عن الحب "لغات الحب الخمسه"

كتبت: رضوى نجيب متخصصة الاتيكيت والبروتوكول

كتير من الناس المرتبطين  ( خلال الاستشارات اللى بقابلها ) بيأكدوا على انهم بيحبوا جدا الشخص اللى معاهم  " نصهم التانى "  وبيثبتوا ده بطرق كتيرة  ولكن رغم كده مهما عملوا و عبروا مبيوصلش ليه اوممكن نقول  نسب ارضاءه بتكون صعبه اوى.. فبيوصلوا لنقطة خطر جدا وهى التشكيك ف حب الطرف التانى ليهم 😕..

الحقيقه واللى لازم ناخد بالنا منها لانها مهمه جدا هى قاعدة ثابته فى العلاقات العاطفية "  قدم الحب وفقا لاحتياج الطرف الاخر وليس وفقا لرؤيتك أنت "  بمعنى  ان  أهمية الاهتمام والعطاء بتكمن ف العطاء حسب الحاجه .. مينفعش شخص جعان تقدمله زجاجة مياة ! ، لانه محتاج اكل مش شرب ف الوقت الحالى .وبالتالى  ده مش انتقاص من حجم اهتمامك ولكن هوعدم تركيز على احتياج الطرف الاخر .

وعشان تعبر عن حبك واهتمامك بشكل فعال وناجح ، لازم تعرف انسب طريقة بيستقبل بيها الشخص اللى قدامك ، ازاى يا رضوى ؟ هقولك.

المؤلف د/ جارى تشابمان Gary Chapman  ذكر فى كتابة " لغات الحب الخمسة" .

ان علاقات حب وزواج كتيرة بيكون الطرفين منسجمين جدا ومحبين لبعض بشكل غير عادى ولكن طرق التواصل بينهم مش بأفضل شكل ، مثال :

ممكن زوج يستمر ف انه كل صباح يحتضن زوجتة بقوة ودفئ ،ورغم ده يشعر ان جواها شئ مش مُشبع او مكتفى  .رغم تكراره للحضن ده كل يوم الصبح . فيبدأ يشك هل انا قاسى  طريقة احتضانى ؟ ولا زوجتى عندها حالة فتور تجاهى ؟! ويبدأ مخه يصورله امور كتيره غير حقيقية بالمره . مع ان الامر ابسط ما يمكن ، وهو ان زوجته بتميل  "للسمع" اكتر ، يعنى حابه تسمع كلمات حب واطراء اكتر من الاحتضان الصامت . و ده مسببلها عدم اشباع ..

وبناءا عليه تعالوا نتعرف على لغات الحب الخمسة .

اول لغة وهى " الوقت " :

بعض الاشخاص ممكن جدا ميهتمش بنوعية الكلام اللى تعبرله بيه عن حبك ، ولكن يفرق معاه جدا ، انك تقضى معاه وقت كافى " اطول وقت ممكن" ، سواء فى المشى ، او شوبنج ..ده بالنسباله بمثله اشباع عاطفى .

تانى لغة وهى " اللمس " :

 وده بيميل ليه الشخصيات الحسية اكتر من السمعية ،يعنى ممكن جدا  طبطبة خفيفة او لمسة ايد حنينة توصله حبك وبالتالى توصله لنقطة اشباع . ودى سيدات مصريات كتير بيميلوا للنوع ده ، اللى هو التواصل الجسدى ، وده نوع حساس جدا لانه بيوصل مصداقية مشاعرك من خلال اللمس ..

ثالت لغة وهى " الاعمال / التصرفات "

 ناس كتير ف اللغة دى خصوصا ، اول شئ بيخطر ف باله " تصرفات يعنى فلوس " تنتنتاااا 😈

 والحقيقه المسألة أبسط من كده بكتير ، ممكن أحد الاطراف يكون محتاج مساعده بسيطه فى  شغله او حياته ، زي " كتابة  شئ  او نقل حاجه من مكان لاخر ، او المساعده فى تحضير ملابس لاجتماع مهم مثلا .. وبيكون ف تقديره ان مساعدتك ليه ف انجاز شئ ولو بسيط هو احترام ليه وتقدير لوقته فبيكون رصيده كبير ف قلب الشخص ده . ويعتبر كنوع من الدعم الانسانى والعاطفى .

رابع لغة وهى " الهدايا  "

 ومش بالضرورة تكون هدية سوليتير عشان يتم الشعور بالاشباع العاطفى ، ممكن ورده او كتاب او تذكار لشئ مميز عندو ، يكون كافى ،والغرض منها ، هو شعور الشخص ده بأنه دايما محل اهتمامك و على بالك وبالتالى عبرت عن ده بهدية .

خامس لغة والاخيره "  الكلمه "  

و دى بتكون أبسط طرق التعبير ولكن اكثرها حساسية خصوصا وجها لوجه .  وبيعتمد عليها بشكل كبير الشخصيات السمعية طبعا ، بتحققله نوع من الانبساط انه يسمعك بتعبر عن حبك ليه بكلمة " بحبك ، وحشتنى . احب اشوفك ...الخ " .

الحب نجاحه معتمد على ميزان ( حقيقة المشاعر و طريقة التعبير عنها )

ويبقى السؤال الاهم .. اعرف ازاى يا رضوى انسب لغة اعبر بيها للشخص ده ؟ او اعرف لغته المفضلة منين ؟

بمنتهى البساطة هتلاقيه هو / هى نفسه طريقته المفضلة بتظهر فى طريقة معاملته ليك . ولو كان صعب نوعا ما عليك استيعابها . لابد من سؤالك ليه ، ووقتها هو هيقدر ده بشكل كبييير جدا . انك مهتم تعرف افضل طريقة تعبرله بيها عن حبك ..

( ناس كتير بتحب ، ولكن لأكتمال دايرة الحب لازم اعرف اعبر عن حبى ازاى بشكل صح ، عشان اضمن تطور ونضج العلاقه دى 💘👫

#اتيكيت_العلاقات

#هووهى