كده هبقى سكسى اكتر
فضلنا كذا سنه نقول جملة (التطور الطبيعى للحاجه الساقعه ) لحد ما وصلنا لمرحله (التطور الغير طبيعى للبنى آدمين)
فى بداية التمانينات ظهرت موضة عجيبه ان الشباب بدأوا يلبسوا قمصان مشجرة وواسعه اوى وكان اللى بيلبسها مصطفى قمر ، ومحمد فؤاد وحكيم الناس اللى بتغنى من العميق الجوانى دى .. ومع الوقت بدات الناس تحس ان مش عيب وفيها ايه لما امشى مع موضة الامريكان ودخلنا البنطلون الجينز الممسوح اللى لونه خفيف ده .
و شوية شوية توقف الشباب عن التجديد ، واصبحت الكره فى ملعب البنات .بقيت البنت تفتح الجيب من الجنب وتلبس تحتها بنطلون ستريتش (كده هبقى سكسى اكتر) ، و بعدها قررت تضيق الجيب بالدرجه اللى تخليها متعرفش تقعد اصلا بس المهم ان الشكل يفضل عاجبها .. وصولا لمرحلة اننا عملنا اعادة تدوير للبس المستهلك او المتهالك بالمعنى الاصح
البنطلون الجينز لونه يبهت ف أقصه كام قصه من قدام من الركبه و ما فوق وما تحت . عشان يبقى فانكى اكتر .لحد ما وصلنا لاخر تقليعه من شهر بالظبط .. ان البلوزات والبنطلونات بنخرمها او نقطع منها حتت بحيث يكون منفذ هوا ..
بعد كل ده السؤال ليكى انتى ؟
هل ف حياتك عندك اساسيات لجمالك كأنثى ؟ او بمعنى تانى فى مستوى لانوثتك مينفعش تنزلى عنه ؟
لو اه يبقى ممتاز جدا .. بس محتاجه كل فترة تفكرى نفسك بيه.
ولو لأ يبقى أسمحيلى اقولك من ناحيتى كشخص متخصص ، ان ربنا من البداية خلق لكل جنس تكوينه وطباعه اللى مهما حاول يخرج بره اطارها شكله هيشذ عنها .
علميا ومنطقيا .. البنى آدم بيختار لبسه بنسبة 80% عن اقتناع شخصى وارتياح ليه و 20% تفكير هل الناس او الاخرين هيتقبلونى بالشكل ده ولا هيرفضونى ؟ ولو جالنا شك ولو 1 % من العشرين دول ان احتمال شكلنا يترفض بنبعد عن الشكل ده . مش لاننا بنهوى المظاهر او لان انطباعات الناس ف حياتنا غاية ف الاهميه ، ولكن لان الطبع البشرى فينا اننا خُلقنا بنتبسط من اعجاب الاخرين بينا سواء (بشخصنا ، بشكلنا ، بملامحنا ) ومهما ابدينا انزعاجنا من اى لمحة استحسان او اعجاب ولكن داخلياً الروح المعنوية بترتفع ..
انك تلبسى بنطلون او شراب مخرم او مقطع وشكليا متهالك ،ده مش رغبه منك ف الاختلاف او الشياكه ، ولكن انتى بتلعبى مظهريا على شئ يصعًب عليكى اظهاره ف شخصيتك وهو ( التميز )
زى بالظبط الشخص اللى عايز يظهر كمدير قوى وليه تأثير ع الاخرين ، ف لانه معندوش الكاريزما والتمكن العملى فبيستعوض عن ده ، بالصوت العالى والانفعال على مرؤوسية .عشان يظهر قدامهم انه شخصيه مؤثره .. ولن هو اثر بالسلب مش بالايجاب.
فمفيش اى انثى عموما ، بترفض انها تكون محل اعجاب ولو رجل واحد على الاقل ..اى انثى كده ..وعشان تحاولى توصلى لده فأنتى بتظهريه من خلال العبث بمظهرك ومحاولة تغييره للفت النظر ، بس انتى كده بتشوهى مظهرك او بتقللى من انوثتك ف نظر الاخرين .
وياريت متنسيش ان ف سيدات كتير مميزات وناجحات جدا و مؤثرات خصوصا رغم عدم جمالهم الشكلى او الجسمانى
زى ( اوبرا وينفرى ، امل علم الدين ،ليزى فيلازكويز"انحف فتاه فى العالم" )
اظهرى جمالك من غير ما تشوهى طبيعتك
تعليقات
إرسال تعليق