الجواز اختراع فاشل ؟!

مساء الفل عليكو

بقالنا كتير متقابلناش ف البلوج، الحياة واخدانا ..بس بصراحه خلال الفترة اللى فاتت كنت ببص حواليا شايفه حاجه مهمه اوى ..

كلنا بلا استثناء خبرتنا او انطباعتنا عن فكرة الجواز جاية من 3 اتجاهات بأختلاف النسب .

 من البيت والاب والام وعلاقتهم ببعض - 

   من اصحابنا المتجوزين وسؤالنا اللذيذ ليهم " ها ايه اخبار الجواز ؟ " وطبعا احنا مش بتكون نوايانا اننا نطمن على سعادتهم قد ما بتكون احيانا الدماغ فيها صراصير  -

 وتالت حاجه والاخيره . قراءتنا وافكارنا الخاصة واحلامنا -

اولا :

 لو اتربيت ف بيت فية اب محب وكلامه حلو وام مقدره وحنينه ، البنت هتطلع ايجابيه ، حنونه ،متفهمه والولد هيطلع راجل لطيف و ذوق ومهذب لان المناخ ايجابى ، ولو طلعت ف بيت الاب فيه وظيفته يشتغل بس ويرجع يستنى كوباية الشاى وكلامه قليل فالبيت  والام عايشة بمبدأ ( كفاية دخلتك علينا، وهو الراجل مطلوب منه ايه غير انه ميخليش بيته محتاج حاجه )  هتطلعى بنت متحفظة زيادة و ناشفة و الولد هيطلع شايف ان الامان ف المادة وعلاقته الاسرية مش افضل ما يكون . بيقوم بالواجب وخلاص ..

احنا 60% نتاج التوليفة الاسرية دى  ( طباع بابا اضربها ف طباع ماما ) طلع شاب او بنت واخدين بعض الحلو وبعض العيوب . ،

:ثانيا 

 لو علاقتك بأصحابك قريبة وانت بطبيعتك سريع التأثر هتلاقى ان اكتر اصحابك اللى بتشوفهم عالقهوة او فالتليفون بأستمرار هما اكتر اشخاص بيأثروا عليك بأنطباعاتهم عن علاقتهم الزوجية .

اللى يقولك مانا كنت حر وعايش اليوم بيومه وبرنس !

واللى تقولك .انا كنت ف بيت ابويا باكل وبشرب و رايقه 

واللى يقولك الجواز د اختراع فاشل يا عم ده بيكون غالبا  " اما مجبر عالحياة عشان الولاد او سعيد ومتهنى وخايف من الحسد" معرفش على ايه هو مش اول ولا اخر المتهنيين . ولا متجوز مونيكا بيلوتشى !

 ويبقى فعلا حظك حلو لو صحابك من النوع العاقل الرزين اللى مبيرغيش كتير عن حياته سواء سعيده او متوترة . وديما يكتفى بأن كله تمام الحمدلله وادى حال كل البيوت ..شد انت حيلك وفرحنا بيك والجواز استقرار بردو ،  او تقولك بصى اى بيت مبيخلاش من الاختلاف بس كفاية دخلته عليكى البيت واحساسك بالامان ..

تخيل بقى لو الكلمتين الحلوين دول حطيناهم عالتوليفة الاسرية اللى فوق ودخلناهم ف مخك ؟! اكيد رؤيتك وشعورك تجاه الارتباط هيكون ايجابى 

واللى غالبا بيكون جزء مهم من افكارنا  عن فكرة الحب والارتباط ..

بس خلينى اقولك ان اهم حاجه انك  تفهم انت عايز ايه من الارتباط ؟

ومستعد جديا تقدم ايه لو دخلت ف علاقة ؟

 والشرارة المهمة جدا والقاتلة احيانا ..

انك لما تستوعب كويس طبيعة شخصيتك ، تقدر تحدد ايه الطبيعة المقابلة اللى تقدر تتفاهم معاها .

زى ما بنقول " مواصفات الطرف التانى "لان دى ان شاء الله احب ابشرك انها هتعيش معاك سنين ، والاهم والاكثر حساسيه  هتجيب منها اولادك، يعنى هياخدوا صفاتكوا مخلوطه ف بعض  ،تخيل طفل هيكبر واخد عيوبك اللذيذه مع عيوب الطرف التانى الالذ ومزاياك ومزاياه و أضف الى ذلك مكونات شخصيته الخاصه اللى الحياة هتكونهاله ... حاول تتخيل !

اكتر العاب بتنمى الذكاء هى الالعاب اللى فيها تفاعل وفعل ورد فعل ..

الحب والارتباط زى اللعبه  ،عشان ينجح محتاج تفاعل على نفس المستوى الفكرى  عشان يعلى بيك ، مينزلش ..

اللى بيخلى الجواز ينجح انك تكون عارف ازاى تعالج وتهندل علاقتك ..

وافتكر ان كلمة ( انا قررت ارتبط بفلان ) بيتبنى عليها تسلسل جيل كامل ،فكر كويس  النبى 

#رضوى_نجيب