أهم 3 أحتياجات فى العلاقة العاطفية و الزوجية

كتبت : رضوى نجيب أستشارى الاتيكيت واتيكيت العلاقات

اتعودنا من زمان اوى ان "العلاقة العاطفية " هى بوابة لتحقيق امانى واحتياجات ورغبات كثيرة . المعنوى منها والمادى ..

على سبيل المثال

البنت فى الفئة العمرية من ( 16 ل  27 سنه ) اول ما بتدخل فى علاقة عاطفية بيكون الموضوع بالنسبالها #فانوس_سحرى على هيئة راجل ظهر فى حياتى لتحقيق رغبات كتير واللى بيدعم الفكرة دى كمان هو الاهل  بالجملة الشهيرة  " لما ترتبطى هيعملك ويعملك ، وتعملى معاه حاجات كتير "

عايزة اسافر فسحه = لما تتجوزى سافرى مع جوزك

عايزة اهاجر= لما تتجوزى مكان ماهو يسافر  رجلك على رجله 😒 

عايزة اركب عجل = ابقى اركبى عجل وعيلي زى مانتى عايزه معاه

عايزة احب = لما تتجوزى حبى جوزك حب حلال ..يوووه 😈

فبقى الراجل بالنسبالها هو البوابة اللى هتحقق من خلالها احلام و رغبات مؤجله كتيرة

اما البنت فى الفئة العمرية من ( 28 ل فما فوق التلاتين واكتر ) بتكون غالبا عرفت ازاى توصل لرغباتها الفردية بنفسها بدون عامل مساعد اسمه الراجل . مع الاخذ فالاعتبار  ان ف بنات كتير ف الاعمار دى مازالت تبع التصنيف السابق

ده كان بالنسبة للرغبات الفردية اللى ممكن جدا بشوية حماس تحققها بنفسها ولوحدها . ماعدا الحب طبعا .

واللى طبعا 99.9% من الرجال بيقدروا يعملوا كل ده بدون العائق المدعو ( لما تتجوزى ) .

ولكن ندخل ف الجد بقى . بعض الرغبات بتكون نايمة او هادية خامدة كده جوا البنت بشكل خاص ،زى ايه ؟

-          الاحتياج للعواطف

-          الاحتياج الجنسى

-          الاحتياج لأن تكون مسموع

·         طيب ماهو الاحتياج العاطفى ميختلفش عن الاحتياج لكونى مسموع ؟!

لأ .. الاحتياج العاطفى بنمثله بالاذن ( الودان) اى بنى آدم على وجه الارض بيكون محتاج لانه يسمع كلام بيعبر عن الحب والمشاعر  بيكون محتاج لحضن "ضمة احتواء "

·         الاحتياج الجنسى بيبدأ الشعور بيه مع بداية البلوغ ، سواء فالراجل او البنت ، بيحس بيه مع اى مشهد عاطفى يمر قدام عينه ، مع اى كلمة غزل قوية شويتين ، مع اول لمسة ايد فالعلاقة العاطفية  .. وبيتدرج تطور الشعور وصولا للرغبة فى علاقة متكاملة حتى الوصول للشبع الحسى والجسدى .

·         الاحتياج لانك تكون مسموع . وارد جدا ان الاهل او اقرب الاصدقاء يكونوا بيسمعوك وبيشاركوك افكارك او ازماتك و حيرتك ..ألخ  ، ولكن فكرة مشاركة الحبيب ليك فى التفاصيل دى بيديك اشباع نفسى وراحة قوية جدا ، خصوصا لو بيسمعك وهو جسديا قريب منك سواء بضمة او بلمسة ايد توصل الطمأنينة ..

الثلاث احتياجات دول بيكون كلا الطرفين منتظر الارتباط العاطفى ومن ثم الجواز علشان يُشبعهم بالشكل المُرضى ليه..

طيب هل الاحتياج العاطفى والاحتياج للسمع قبل الزواج بيكونوا كافيين او بديل للأشباع الجنسى ؟ او بمعنى تانى الاحتياجين الاول والتالت بيتم اشباعهم ماعدا التانى فى فترة بداية العلاقة العاطفية وقبل الجواز ..ده كافى ؟

ومين قال ان قبل الجواز مبيكونش ف بعض الاشباع الجنسى ؟!

الكلام الحلو و الغزل و النظرات الدافية ، لمسة الايد  اللى بيخص بيها كلا الطرفين بعض بتفرز هرمون " السيروتونين " او هرمون السعادة زى ما بنسمية  الهرمون ده بيشتغل على جزء من خلايا المخ الخاصة بعملية الاشباع الجنسى وبالتالى بيشعر الواحد بحالة من الاستقرار نوعا ما . او بتكون كبديل مخدر للأحتياج ده بشكل مؤقت

انت لو سألت شخص متجوز " بعد العلاقة الزوجية بتحس بأية ؟" هيبتسم ويقولك بحس انى مبسوط و راضى وحاسس بالشبع خصوصا لو كان كلا الطرفين حريص على اسعاد وارضاء الطرف التانى  "سعادة تبادلية "

وبالتالى نوصل هنا للُب الفكرة .

عدم حرصك على توصيل الطرف التانى فالعلاقه العاطفية او الزوجية معاك للرضا او الاكتفاء والاشباع النفسى والمادى هيوصل العلاقة لمرحلة فتور و بالوقت برود عاطفى . وجايز جدا يكون بيحبك ولكن شعوره بالذبول الداخلى يخليه يتخلى عن العلاقة والبحث عن راحته النفسيه وعلاقة اخرى اكثر اشباعاً وتقديراً

فأحرص على التعبير عن مشاعرك ليه سواء بحبك او رغبتك ف وجوده او احتياجك ليه ، لان بقدر رغبة الطرف التانى فى الشعور بحبك ليه ،بقدر رغبته القوية فى الشعور بأحتياجك ليه . متخجلش انت او انتى فى انك تعبر عن نفسك

https://www.facebook.com/RadwaNagub/

أتيكيت_العلاقات#

هووهى#