مبقيتش بغير عليه

كتبت : رضوى نجيب

متخصصة الاتيكيت والبروتوكول

فى الجواز والعلاقات كل يوم بقابل تجارب لزوجين بيأكدولى فكرة " انا اتجوزت عشان أستقر / عشان اخلف / عشان معنسش / عشان كلام الناس / عشان عديت ال 27 / عشان خلاص اشتغلت وكونت نفسى فاضلى بس اتجوز !

وبالتالى بنرهن حياتنا بأشخاص ملحقناش نعرف شخصياتهم ولا أفكارهم ولا حتى أسرارهم او نقط ضعفهم ف الحياة .. وطبعا بعد فترة طويلة من الجواز بنكتشف اننا منزعجين من حاجات كانت ف الاساس واضحة جدا من البداية ولكن كملنا واحنا عشمانين ومتوقعين اننا هنقدر نغيرها ، او بكرة هيتغير محدش بيفضل على حاله .. من غير ما نتعب نفسنا ف اننا نفكر ان فى امور اساسية مبتتغيرش وامور ثانوية قابلة للتغير .

وده اللى بقابله تقريبا كل يوم من خلال استشارات #أتيكيت_العلاقات .. مع الازواج والمخطوبين او حديثي الارتباط الاعاطفى

خلونى اوريكم نوعية من الاساسيات اللى لما بنغمض عينينا عنها بالوقت بتولد فتور وزهق من الطرف الاخر " وعلاقة ميته " :

اتعرضت عليا أستشارة من زوجين ، وكان المشتكى او المتضرر " الزوج " وقالى :

مراتى غيرتها عليا بقيت فاترة ومش موجوده مهما استفزيتها فيها مبتتحركش ، معرفش د ثقة عمياء فيا ولا انعدام حب ؟!

لما قعدت مع الزوجة كان ده ردها :

هغير عليه ليه ؟ خايفه واحده تحبه وتخطفه منى مثلا ؟! ههههه هتاخده على ايه ؟ فلوسه ولا كاريزمته ولا نجاحه العملى القوى وترقياته ؟ انا عارفه انه سواء ف الشغل او عالفيسبوك مفيش واحده هتتشد اوى ليه ..فهو ف النهاية ف مكانه 😌

تخيل معايا كده لما شريك حياتك بعد سنين من الجواز ، يبقى داخليا شايفك كده :

* لا تملك كاريزما

* غير ناجح عمليا

* مش جذاب

سواء كنت واحد او واحدة .

ورغم ده بيتجدد يوميا الحياة بينكو بنفس التفاصيل ( صحيان ، اكل ، شرب ، تبادل حوار ، خلاف ،اتفاق) .

الاستشارة دى خرجت منها بحاجتين مهمين اوى ، عايزاك لو كنت لسه داخل على علاقة تركز فيهم وتقيمهم بعقلك الاول ثم بعواطفك ، ولو فعليا دخلت علاقه قيس مدى مرونتهم :

1- انت شايف الشخص اللى قدامك ازاى ؟ بتتخيله ازاى يعنى من جواك ؟ هل شايفه ناجح او عندو بذرة النجاح بس محتاج دعم ، ولا شايفه شخص غير متطور وخطاه واقفه ، عندو شخصية تغذى علاقتك بيه " لطيف ، ودود ، اجتماعى ، ذكى " ولا بمرور الايام كل اللى بيتيغير فيه ملامحه وسنه وبس ؟ " مالى روحك " مقتنع بيه

2- و ده شئ مهم جدا .. هل لو مر بلحظة سقوط او انكسار زى اى انسان طبيعى ، ده هيهز مكانته جواك ؟ هل هتحس انه جدير بدعمك ليه ولا " هو انا شوفت يوم حلو معاه اصلا ؟! "

و رجوعا للقصة اللى بناقشها انهارده " عن الغيره " ، تخيل لما يبقى عدم غيرتك مصدرها انك شايف شريك حياتك " مش محل اعجاب أصلا" وبالتالى انت مطمن او بمعنى اوضح فاقد الامل ف فقدانك ليه !! )

هنبقى اتنقلنا من مرحلة انا واثق ف شريك حياتى وبالتالى غيرتى عالهادى ولكن موجوده ، لمرحلة مين هيبصله اصلا .

((انت عايش مع شخص نظرتك ليه مطفيه .))

ختاماً الشئ الجوهرى انه مهما كانت اسبابك للأرتباط متعدده . مترهنش حياتك بتفاصيلها بشخص لما بيكون قدامك مبتحسش بطاقة تدفعك ليه ، شخص بتنور وانت معاه .. شخص متقبل ومتعامل مع أصعب عيوبك ، و فخور بمزاياك .. والاهم امين علي ضعفك